No blir Brian FC Groningen-spelar

17-åringen frå Askøy blir fotballspelar på heiltid.

– Det er veldig kjekt, seier Brian Jahren frå Erdal.

Stortalentet har skrive kontrakt med FC Groningen sitt akademi, og om mindre enn tre veker dreg han til Nederland for å bli fotballspelar på heiltid.

17-åringen spelar no for Brann 2. Å bli henta til Groningen er eit solid steg framover i karrieren.

– Målet er jo å etablera meg på førstelaget, seier han.

Har følgd han lenge

Groningen har hatt askøyværingen på radaren i to år, etter at han spelte fotballcup i Rotterdam. Men koronapandemien hindra ei stund tettare kontakt med klubben. Tidlegare i vår kom han seg endeleg på treningsopphald i Groningen. Og der imponerte han nok til at dei hentar han.

– Eg skal nok rett i trening og oppkjøring når eg kjem dit, seier Jahren.

Følgjer etter Robben og Koeman

FC Groningen er ein solid klubb som spelar i æresdivisjonen, den øvste divisjonen i det nederlandske seriesystemet. Komande sesong i æresdivisjonen byrjar 14. august og blir avslutta 15. mai neste år.

Blant spelarane som har vore på Groeningen sitt a-lag finn ein Erik Nevland, Luis Suárez, Arjen Robben og Ronald Koeman. Både Koeman og Robben starta si karriere i akademiet Brian Jahren no blir del av.

Heimestadionen har ein kapasitet på ligg over 22.000 tilskodarar.

Byen Groningen er i folketal litt mindre enn Bergen.

Klikk her for å lesa meir om stortalentet frå Erdal.