Fleire hundre askøyværingar som kunne fått vaksine no, har ikkje bestilt time

– Vi har meir enn nok vaksinar, men manglar armar å sette dei i, seier smittevernlege Lotte Silnes.

Smittevernlege Lotte Silnes håpar fleire vil ta både første og tredje vaksinedose.
  • Synnøve Nyheim
Publisert: Publisert:

Kvar veke oppdaterer kommunen tala sine, og sender ut SMS-varsling til dei som oppfyller kravet om at det skal ha gått 20 veker sidan dei fekk sin andre vaksinedose.

No i starten av januar er det dei som fekk andredosen sin i midten av august, som får innkalling til vaksinasjon i Askøy forum.

Kunne vaksinert fleire

Målet er at alle vaksne skal ha fått tilbodet innan utgangen av februar, eit mål Askøy ikkje skal slite med å nå. I dei eldste aldersgruppene er opp mot 90 prosent vaksinerte med tre dosar, medan det minkar nedover. No er det mange over 40 som har gått 20 veker sidan andre vaksinedose, men mange har ikkje takka ja til den tredje enno.

– Det er fleire hundre askøyværingar som kunne ha bestilt seg time, som ikkje har gjort det, seier Silnes.

Les også

Sjekk tallet på smittede og vaksinerte

Ho seier dette fordeler seg ganske jamnt på dei ulike aldersgruppene, men dei som har vore aller flinkast til å stille opp, er dei mellom 65 og 75 år.

Silnes er klar over at det er nokre som fell utanfor systemet, og derfor ikkje mottek innkalling.

– Vi finn ikkje heilt ut kvifor dette skjer. Dei det gjeld, må ringe koronatelefonen og bestille seg time, seier ho.

Har kasta få dosar

BT skreiv måndag kveld at rundt 14.000 vaksinedosar blei kasta i Bergen i fjor, då dei hadde gått ut på dato. Silnes seier dette ikkje har vore eit stort problem på Askøy.

– Vi har kasta veldig lite. Det var eit stort parti med Moderna-vaksinar som vi ikkje fekk brukt opp, og då blei det kasta eit par hundre dosar, fortel ho.

Dette var i haust, då det var mange som var skeptiske til denne vaksinetypen, og heller ville ha Pfizer. No har dette endra seg, ifølge smittevernlegen.

– Det er omtrent halvparten som vel Moderna no, vi ser at den har fått meir fotfeste, seier ho.

Kommunen har også gått til innkjøp av ein medisinsk frys, som gjer at dei kan oppbevare vaksinedosane lenger.

Vil at fleire tar første dose

Sidan rett før jul har det også vore mogleg å få koronavaksine på Apotek 1 Askøybrua. Silnes seier det er svært gledeleg at fleire har valt å ta sin første koronavaksine etter at dette tilbodet opna.

– Det håpar eg det er endå fleire som vil gjere.

Fordi omikronvarianten av koronaviruset spreier seg raskare enn dei tidlegare variantane, er det venta ein smitteauke no på starten av året. Kommunen har difor oppmoda uvaksinerte om å ombestemme seg.

Forsvaret rykker inn

Frå denne veka får Askøy kommune også hjelp frå Forsvaret til vaksinasjonen. Dei får både ein lege som skal vere i beredskap i tilfelle nokon får alvorlege, allergiske reaksjonar på vaksinen, og dei skal ha fleire inne på opplæring som skal bistå i vaksinasjonen frå neste veke.

Kommunen har foreløpig sett opp vaksinasjonsdagar kvar tysdag, onsdag og torsdag. Truleg vil dei auke til fleire dagar i veka i slutten av januar, då endå fleire vil kunne få tredje dose.

Publisert:
  1. Koronaviruset
  2. Vaksine
  3. Helse

Mest lest akkurat nå

  1. Har du hørt om padel? Nå er det planer om slikt anlegg i Storebotn

  2. MC-fører mistet lappen etter å ha kjørt i bil bakfra

  3. Opplever hets, men lar seg ikke skremme

  4. Christian sprang i 24 timar

  5. Suverene Sørli knuste konkurrentene - igjen

  6. Fremdeles en stund til det blir bompenger her