Dei to fann kvarandre medan dei skulle finne andre

Torsdag 6. januar er det premiere på NRK-serien Redningshundene. På skjermen får du sjå to askøyværingar.

Paret bur, trenar og dreg på oppdrag i lag med redningshundane Baloo (t.v) og Yukon.
  • Solveig Høegh-Krohn
Publisert: Publisert:

Tom Christian og Trine jobbar i lag med bestevenene Yukon og Baloo. Ein schæfer og ein toller, begge seks år gamle.

I fjor var dei med på mellom 35 og 40 leiteaksjonar. Nokre av desse vert å sjå på skjermen i tv-serien.

Ulike nybyrjarar

Det heile starta på eit nybyrjarkurs for hundeførarar.

– Eg var ikkje så veldig interessert i han i starten, seier Trine om ektemannen medan ho humrar.

Det endra seg fort. Gjennom det vekelange kurset fann dei tonen. Trass i at dei kanskje ikkje virka så like.

– Trine er eit fyrverkeri av eit menneske, med kjenslene utanpå kroppen. Eg er vel meir nedpå og uttrykker ikkje det på same måten, seier Tom Christian.

Ein pratsam sosionom frå Bergen og ein tidlegare yrkesmilitær og sjukepleiar frå Sandnes fann kvarandre på ein stad der dei skulle lære seg å finne andre.

– Vi har begge eit behov for å bidra med noko og er opptekne av menneske, seier Trine.

Frå Askøy til Hardanger

No hjelper paret og hundane deira politiet og hovudredningssentralen nesten kvar gong nokon vert meld sakna på Askøy. Sjølv bur dei i Kvernhusdalen.

– Ingen av oss har eigentelg eit forhold til Askøy, men begge ønska seg einebustad med hage som hadde plass til hundane. Og det å kunne bu litt landleg med turterreng nesten rett utanfor døra. Slik gjekk Askøy inn i hjarta våre, seier Trine.

Men på oppdrag reiser dei også andre plassar.

– Vi deltek på aksjonar frå Stord i sør, til Sognefjorden i nord og Hardanger i aust, seier Tom Christian.

Paret har vore med på mellom 35 og 40 oppdrag i 2021. På Askøy har dei vore med på nesten alle leiteaksjonar det siste året.

Ei dramatisk hending

Mellom anna var dei to med på den dramatiske redningsaksjonen ved Tokagjelet på Kvamskogen i fjor haust. Det var ei spesiell oppleving.

– Ein annan hundeførarar var pårørande til dei sakna. Det sette sitt preg på situasjonen at det handla om nokon av våre eigne, seier Trine.

Heile NRH Hordaland var med i søket etter dei sakna. Mellom 17 og 20 hundeførarar og hundar leita i to døgn.

Diverre vart dei tre sakna og ein hund funne omkomne.

Så mange som mogleg

Å hjelpe andre å finne dei som dei er glade i, er ein viktig motivasjon for begge to.

Trine har sjølv ei venninne som opplevde at ein kamerat forsvann.

– Eg såg kor fortvila ho var. Ofte står det om liv, då er det viktig at så mange som mogleg bidreg.

I dag drar paret ofte ut på oppdrag i lag.

– Vi trenar fast tre gonger i veka. Til saman vert det 15 timar, seier Tom Christian.

Eit bryllaup fullt av hundeførarar

Mange av venene deira høyrer også til den same organisasjonen. Det merka dei under bryllaupet i august.

– Om alarmen går no, er jo mange i bryllaupet! tenkte Trine.

Heldigvis gjekk det bra.

På torsdag rullar dei to over tv-skjermen i lag med Yukon og Baloo. Dei håpar at serien kan vise fram det arbeidet dei gjer, men også kven menneska bak er.

Publisert:
  1. NRK
  2. Hund
  3. TV-serie

Les også

  1. – Jeg velger å tro at de holdt rundt hverandre den siste stunden

Mest lest akkurat nå

  1. Dette popper opp over alt. To ulike aktører ønsker å etablere tilbudet på Askøy

  2. Søk i dødsannonsene

  3. Vannledningsbruddet er utbedret

  4. I februar 2019 døde Oliver Emir (2) av hjernekreft. Tre år senere ligger lillesøster i foreldrenes armer

  5. Det videre arbeidet med Kildn må være grundig og godt