Norvald Hestholm til minne

Tidlegare rektor ved Træet skule på Askøy, Norvald Arthur Hestholm, er død, 86 år gamal.

Norvald og Grace Hestholm vart heidra av Askøy Mållag då Norvald gjekk ut av styret i februar 2017. Her er dei saman med mållagsleiar Erlend Bakke (t.v.) og tidlegare leiar i Askøy Mållag og Hordaland Mållag, Einar Ådland.
  • Einar Ådland, Askøy Mållag
  • Erlend Bakke
Publisert: Publisert:
Denne artikkelen er over fire år gammel

Hestholm var fødd i Herøy i Møre og Romsdal, og voks opp der. Etter utdanning ved lærarskulane på Nesna og Notodden var han lærar ved fleire skular på Vestlandet. I 1965 fekk han stillinga som rektor ved Træet skule. Der vart han verande i nesten 31 år til 1995, og sette merke etter seg både som dugande skulemann og som prinsippfast målmann.

Hestholm var leiar og styremedlem i Askøy Mållag frå 1976 til han gjekk ut av styret i februar 2017. Dessutan var han bladstyrar og skriftstyremedlem i mållagsheftet «Jul på Askøy» i ein mannsalder frå 1980. Norvald var heiderslagsmann i Askøy Mållag. Og heidersmann var han - og idealist.

Den innsatsen han gjorde for målsaka kan knapt vurderast høgt nok. Ved å ta vare på og dyrka nynorsk skulemål kom Norvald Hestholm til å spela ei avgjerande rolle for stillinga for nynorsken på heile nordre Askøy. Det tener han til stor ære at han tok på seg strevet og ansvaret for mållagsarbeidet, også i tider då saka og laget møtte motbør og åtak. Då nynorsken vann i to skulemålsrøystingar – i 2003 og 2010 – i Træet og Fauskanger krinsar, var livsverket som Norvald hadde lagt ned i si daglege gjerning på Træet skule, éin viktig grunn til sigrane.

Les også

Målmann, skuleleiar og idealist heidra

Gjennom undervisning og veremåte synte han fram nynorsken som noko sjølvsagt og naturleg for elevar, foreldre og bygdefolk elles. Med praktiske døme viste han den nære samanhengen mellom skriftleg nynorsk og talemålet på Askøy. Den kjærleiken han hadde til nynorsk mål formidla han til elevane med ein dugleik og varme som gjorde varande inntrykk.

Eit varmt hjarta, ein klår tanke og store samarbeidsevner var typisk for den staute og heilstøypte mannen som no har gått bort. Me ser føre oss det positive og livsglade andletet og den brennande idealismen. – Målsaka er hjartesaka mi, sa Norvald. Det merka me godt.

Einar Ådland, tidlegare leiar i Askøy Mållag og Hordaland Mållag

Erlend Bakke, leiar i Askøy Mållag

Publisert:
  1. Minneord
  2. Minneord

Mest lest akkurat nå

  1. I februar 2019 døde Oliver Emir (2) av hjernekreft. Tre år senere ligger lillesøster i foreldrenes armer

  2. Dette popper opp over alt. To ulike aktører ønsker å etablere tilbudet på Askøy

  3. Tre år er lang tid å vente på bedre og sikrere parkering

  4. Det videre arbeidet med Kildn må være grundig og godt

  5. Opplever hets, men lar seg ikke skremme

  6. Mann (77) anmeldt for fyllekjøring med moped