I august blei det kjent at Sebastian Eide (33) er ein av deltakarane i årets Farmen. Saman med folk frå heile landet med ulik bakgrunn reiste eigedomsmeklaren til ein gard i Søgne på Sørlandet i sommar, og med det reiste han også 100 år tilbake i tid.

Førre veke kom den første episoden på TV 2 og TV 2 Play. Sebastian var ein av dei som raskt stakk seg ut frå resten av gjengen.

Tidleg fann han tonen med 25 år gamle Kornelia Kløv, som i ein av dei seinare episodane har uttalt at dei to truleg har sett rekord i kor raskt dei har blitt eit «Farmen-par».

Første tvikamp mot ei kvinne

Då Sebastian blei valt som andrekjempe den første veka, og dermed blei historisk som deltakar i den første tvikampen mellom mann og kvinne etter at reglane blei endra for årets sesong, var det Kornelia som besøkte han på førstekjempehytta.

– Eg og Kornelia har hatt god kjemi. Det har jo oppstått ein liten flørt, vil eg tørre å påstå, seier Sebastian i episoden.

Ved førstekjempehytta deler også paret fleire kyss, før Sebastian vann over Diana Rooz (30) i tvikampen.

Kornelia Kløv fann raskt tonen med Sebastian inne på garden. Foto: Anton Soggiu/Strix Televisjon/TV 2

Open for å bli kjent med fleire

Mens Kornelia ser ut til å berre ha auge for Sebastian, seier han i denne vekas første episode at det er fleire han kunne tenke seg å bli betre kjent med.

– Eg og Kornelia fekk ein god tone frå starten av. Det var ho eg møtte først. Vi er jo veldig ulike, så ein langtidsgreie ser eg kanskje ikkje heilt for meg. Samtidig føler eg det er mange på garden eg har lyst å bli betre kjent med, seier Sebastian og legg til at 23 år gamle Erika frå Stavanger kanskje eigentleg er meir hans type.

Ikkje redd for å by på seg sjølv

Pressesjef i TV 2, Petter Dahl, seier til Askøyværingen at Sebastian ikkje er redd for å by seg sjølv, og dermed har blitt blant dei deltakarane som har fått mest merksemd etter dei første vekene av årets sesong.

– Det er naturlegvis ekstra hyggeleg at Sebastian og Kornelia fann tonen allereie etter nokre få dagar inne på garden. Så får sjåarane vente i spenning for å sjå korleis det går vidare med Sebastian inne på garden, og korleis fortsetjinga blir mellom han og Kornelia, seier han.

Her er årets Farmen-deltakarar. Framme frå venstre: Carla Maria Haringstad, Diana Rooz, Kornelia Kløv og Martin Hals Johannessen. Midten frå venstre: Björk Valnes Atladóttir, Anders Rydning, Erika Ellingsen, Bent Inge Høiland Rundevold, Charlotte Tigerstedt og Bård Kristiansen. Bak frå venstre: Per Georg Johansen, Sebastian Eide, Yassin El Barkani og Kathrine Jakobsen. Foto: Anton Soggiu/Strix Televisjon/TV 2